Hebrews 11

Gaiciyaga aɓo wowoyi

1Kni yi nu zhin gaiciya ga? Gaiciya ga kwo nu zhin bugba shi ge nya yi ye kwo ɓa zhin. Ko nu zhin gaiciya ga n bugba ge nya lo na bye kwo da shike yi ta mi ya to kwo bwa m, kwo kwa ya gye m.

2N sapai aza ɓei nyi n gaiciya ga yi sosai. Aɓei zhin a kpe ɓa ye ntu ɓa gaiciya ga ɓo.

3Dna gaiciya ga, yi kpe lo ge Shekwoyi nu ɓei zhin anyi n nanyai vinya n ɓa fi n ɓa nyi. Owo ɓeda nu ɓei zhin ɓa, nsasayi kwa zhin.

4Gaiciya ga nu ɓei zhin Habila wa vi Shekwoyi ɓo. Wo ɓei ɓe n nyagayi n kwo ɓei da Shekwoyi ndu Kayinu nya. Shekwoyi ɓei la Habila gwo ɓedo n wo nyaga yi. Habila gwo ɓedo n wo nyaga yi. Habila lafi amma dole ya dna wo wye ya gye wo ɓei kpe ma Shekwoyi.

5Enoch ɓei zhin zanu n gaiciya gayi. Wo ɓei la kpema Shekwoyi. Shekwoyi kwa wa dagma n wo gaiciya gai. Ntu cenu wo to ɓo fi m. Shekwoyi ɓei la wo la lo n cei n ʼshemi.

6Shekwoyi ta wo ho agmada m ndei ho to n gaiciya ga yi m. Oza n wo ye wa ɓe wa ba dole wa ga wo gaiciya. Wa kpe ge Shekwoyi zhin wa ga aza lada n ɓa zan wo shin nyi.

7Nuhu ɓei zhin ʼzanu n wo ɓei kpema Shekwoyi. Shekwoyi ɓo wu wo anya n ɓa ɓa zhin. Nuhu ɓei la gaiciya ga Shekwoyi wa zhin eya ntu ge kwa gni wo puwa. Aza je ɓei gyi abye ɓa zhin laifi. Ɓa to ɓo ga Shekwoyi gaiciya m. To ɓa viwo begye m, Shekwoyi ɓo gwo Nuhu ntu wo gaiciya ga ɓo, n wo ɓo vi yi.

8Ibrahim kwa wo ɓei kpema Shekwoyi sosai. Dna n gaiciya ga wa wo Shekwoyi begye. Shekwoyi ɓo gna wo ge wo fa wa yi wa lo ekni do. Shekwoyi ɓo ku gna ge wo ɓa ga Ibrahim ekni yi. Wo ɓolo, to woi kpe aba n wo lo m. 9Wo ɓei zhin zhiɓeyi nu dna ekni alkawali nya. Ama wo ɓei la kpema Shekwoyi. Wo ɓei dna n na lubui n wo puwa yi vinya Ishaku ɓedo n Yakubu yi ɓa ɓo fi n na lubui ce. Shekwoyi ɓei ga ɓa alkawali ngye Ibrahim. 10Ibrahim ɓei pmi Shekwoyi wa ɓe n woyi n zhimi. Ezhi n Shekwoyi wa mi n wohin yi.

11Saratu ɓei n gaiciya ga yi, Owo gaiciya ga ɓo zhin wo wa ma oɓi woi la kwo. Wa gaiciya ga ge Shekwoyi ɓa nuwo alkawali. 12Ntu cenu, Israila yi bye ɓei pa n Ibrahim nu oza nwo ɓei la kwo sosai. Wonu zhin ebye dnagmayi ye dada. Owo aɓi n mwa begye n gye amwi kwo akpasu ayiwo ge oɓa dada. Wo ɓei la api mi ɓa n ʼshemi.

13Aza ye vinya ɓaku kpe ma Shekwoyi. Nya wo ɓei zhin ɓa alkawali, ɓa ɓo la kwo ga gaiciya. Amma ɓa to ɓo gwo anya vinya n Shekwoyi ɓei zhin ɓa alkawali m. Ɓa ɓei la ye ɓa gwo alkawali, amma ɓa ku ɓa nya fi. Amma ɓa ɓei nagmadayi ntu ge ɓa ɓo kpe ge anyi ye to zhin ɓa nya num. Eyi puwa lo n ʼshemi nu. 14Oɓa ɓeda kwo wu ɓa wyetu. Aza ɓei zhin ɓai shi awye n ʼshe nu, oɓa puwa nu.

15Ɓa ɓei n sai nyi ɓa jeze lo anyi gmada. Ama ɓa to ɓe ye lo ɓo m. 16Maimako ɓa ɓei kni agmada eshe nya nu, ntu cenu a da Shekwoyi lo.

17Sanu Shekwoyi ɓeitu Ibrahim mwi cei nyi wo ɓo dudu wa kpema wo. Ntu cenu wa ga Ishaku owo ɓi. Har wa ku shiri zhin wa zun wo sha ntu sadaka ɓo. 18Wo ɓei ku shiri zhin wawu Ishaku. Koda shike Shekwoyi ɓei ku gna wo ge Ishaku ɓa zhin obye tukwo da. 19Wo ɓei ku kpe ge Shekwoyi ɓa je Ishaku wyewyeyi ga. Enya nu kuwa nkwo ɓo zhin, Ama n Ibrahim aba Ishaku ɓola fi ama wa jeze ɓe anyi. 20Dna n gaiciya ga Ishaku ɓei tu Yakubu anabarka ɓedo n Isuwa yi ntu na bye ɓo.

21Yakubu ɓei fi woi la kwo, ama kafin wo fi wo ɓei yi Yusufu aɓi vinya wa zhin aduwa kpe ɓa, wa tu ɓa anabarka. Duk dna n gaiciya ga nu n wo ɓo zhin aɓo ye.

22Yusufu ɓei n gaiciya gayi, wo ɓo fi woi la kwo ce. Wo ɓei da a Israila gni-gni ɓo n Masar. Wo ɓei ku kpe ge kwo ɓa zhin lo nu. Ntu cenu wa gna ɓa ge ɓa ɓei la wo asunkun ku lo ncei dna n gaiciya ga nu n wo ɓo da ce.

23Musa dada n woʼya yi ɓei n gaiciya ga ce. Ɓa ɓei la gaiciya ga ge Shekwoyi ɓa gni ɓa ɓi n fi. Cenu ɓo zhin ɓa sowo har apya ta. Amma ɓa to ɓei zhin ɓai wo Firauna dna m.

24Musa wohin ɓei gaiciya ga. Wa mwa har wa zhin zayakwo dna Masar, to wa ye ayi wo ge Firʼauna nyigun nugun m. 25Wa ye wa sun wahala n Shekwoyi azayi, wo to ɓei ye wa dagma dna n laifi m. 26Wo ɓei gna wo ta ye wa zhin aɓo n gye a Masar yi aɓin, ama wo ɓo gye kwo ɓa wo du wa sun wahala ntu Shekwoyi alkawali ɓo, Wo ɓei la gaiciya ga ge Shekwoyi ɓaga wo lada n du Masar nya. 27Dna gaiciya ga wa fa Masar, wo to ɓei wo dna ge esu ɓa gyi minagyi m, wo ɓei kpe ge Shekwoyi kunsun lo n woi, Wa kpe ma Shekwoyi iko. 28Wo ɓei ku kpe ge Shekwoyi ɓa gni wo aza, ntu cenu wa gna aza ge ɓa wu kugya ɓa pmiya kwo ami n na bokunmi she, sanu malaika efi nya ɓei duya wo to ɓo wu ɓa ɓi kmisunyi m. Amma puwa doho-dohoi nkwo to ɓei ami yi kpem, wa wu aɓi kmisunyi.

29A Israila yi ɓei la kpema Shekwoyi. Ɓa pi ola dnagmayi ya n gye ɓa piya n kni kawai. Ama sanu na Amasar yi ɓei tumwi ge ɓa lo, ɓa ku bwi nuwan.

30Dna n gaiciya ga Jerikwo galu kwa ʼɓaya, A Israila yi ɓei she galu gun anyipyei tnaba. Shekwoyi gbega nu ɓei. Ɓavi gbega yi kwa. 31Rahab ɓei zhin karuwanu. Ama wo ɓei la gaiciya ga Shekwoyi iko, wo to ɓei fi n kunsun nwo azaje yi m, ɓa ɓei fi ntu ge ɓa to ɓei vi Shekwoyi begye m. Amma Rahab ɓei la azhi-pmigye yi gwo.

Aza manayi nɓa ɓei du anyi kala

32To, mi ɓa shada gena? Esa lami gba, n mi ɓa da aza gaiciya ga ɓo n gye Gidion, Barak, Samson, Jepheta, Dauda ɓedo n Samuila yi. 33Oɓa vinya ɓa ɓei kpema Shekwoyi, Ɓa ɓei gyi kun, ai ku asu ya n ɓa gyi nyi, ɓai gyi be, ɓa gwo anabarka. Har ɓa wu agagwo, to agaba mi nɓa nyaho zhin. 34Ena to ɓei shin ɓa gyin. Abeyakwo to ɓei shin ɓa wu m, Azaho ɓei ku kala bwa. Aza ho ɓaku ze abezhe-yakwo dna soja. Ɓa nya a soja je ya har ɓai busi. 35Azaho ɓai ku aza kala n vingwo, Azaho ɓa ye ge ɓa sun wahala ɓa vi Shekwoyi. Ɓa ɓei ku kpe ge Shekwoyi ɓei je ɓa kala ku ɓa bwa wye-wye yi nyalo-nyalo nya.

36Aɓei zhin a ma azaho san, azaho a sa ɓa naiya n busi yi, azaho kwa a pa ɓa a ya ɓa fi n kurkuku. 37Aɓei kni azaho akuta har ɓa fi. A sa azaho pisa n gun aba nʼbei. Ama aɓei ku ɓa wu n abe-yakwo yi, azahoi vi ana-pa na kugya pai. Mikun yi gun ɓa har nyai san ɓa a zhin ɓa ɓo ntna sun-sun gye. 38Aza ho ɓei zhin aza manayi nu sosai, ama ɓa ɓei zan fi n Zhabui, n na pai. Ɓa fi n nabwo nkni. 39Ɓa ɓei Ikpema Shekwoyi a zhin shiri ntu yi ye n ɓai, ama zaho-zahoi nɓa to ɓei gwo anya vinya n Shekwoyi ɓo zhin ɓa alkawali m. 40Lada lo n du ɓa nya n Shekwoyi a zhin shiri ntu yi ɓo, ntu cenu Shekwoyi yelo ɓa pmi yi ya kun gna.